Talacogon, Agusan del Sur – Usa ka dakong bunga sa pagpaningkamot sa atong mga opisyales sa lungsod gipangulohan ni Mayor Pauline Marie R. Masendo, RN ang pagdawat sa bag-ong Patient Transport Vehicle (PTV) gikan sa Philippine Charity Sweepstakes Office (PCSO), nga opisyal nga gisaksi karong adlawa, Mayo 2, 2025.
Ang maong sakyanan gisangkapan og mga gamit pang-medikal ug pasilidad nga angay sa luwas ug kombinyenteng pagdala sa mga pasyente, ilabi na sa mga kahimtang sa emerhensya, mapalapdan pa ang serbisyo medikal sa mga kabarangayan.
Ang turn-over ceremony gipahigayon sa PCSO Main Office sa Mandaluyong City diin personal nga gidawat ni Mayor Pauline Marie. Ang pag-apruba sa maong hinabang resulta sa aktibong paghangyo sa mayor ubos sa Nationwide Patient Transport Vehicle Distribution Program sa PCSO, nga nagtumong sa pagpalapad sa suporta sa sektor panglawas sa mga lokal nga pangagamhanan.
“Ang pag-abot sa PTV dako’g ganti sa atong paningkamot nga mahatagan ang matag residente sa Talacogon og patas, paspas, ug kalidad nga serbisyong medikal, bisan pa sa labing layong mga lugar sa lungsod,” matod ni Mayor Masendo.
Kini nga kalampusan usa lamang sa daghang inisyatibo sa LGU sa pagpangandam sa mas episyente nga maayong panglawas alang sa tanan.
SERBISYONG TALACOGON, SERBISYONG MAHIGUGMAON!